Wainmu
Written by N Hemsgangdao
Wainsodu namai ningkhe
Niniba baothaikhe,
Baoba ning Slamphin ne
Gmayaba jini thanikhe,
Rikhihi gdani jariminkhe
Ode nuhi gdani haganthikhe,
Mulukni Dimasarao khe masaba
Ning namai,
Susaba ning Dimarajini dara dishakhe
Susaba ning jinni rajikhe,
Majangrine jini raji Dimaraji
Slamsophuya thaolaba,
Khaha wainmu nangba thaolaba.
Hathan maiphin ne
Raji majangrine-
Namai majangdao ning baigoba
Haigerhi hajaithani nolai,
Nolai wathiling-
Haigerba amai abai, daplong bahandao
Ode khajuni lugurao,
Thangpinpuya nolaiha
Maithaisini busuha– thaolaba malaini thaniha
Wainsoba nolaikhe-
Wainsodu luguraokhe–
Wainmu nangba ning-
Namai thaolaba,
Hajik harang gakhuhi
Thangba nolai nolai
Labune greekma
Rajiha jini,
Sereba jajaoba khamthaoriba
Sereba makhao mithim thiba
Dusman ne remhi hodaiba-
Namai wainmu thaolaba,
‘Mlaide (baijare) gdakhe rikhidu – (H1)
Slam slam du majangdaoridu,
Ningde lajidu gdakhe rikhiba”
Namai ning dajabaisi-
Slam ma rajikhe,
Khamao habya jiniba Dimasa-
Niniba baothaikhe,
Haigerpuya gdani dangdab jidabkhe-
Ripnuya thi Dimasa ne,
Ripunang niya hang Dimaraji ne-
Phai namai hagong-
Dangnang yawai thailainang,
Sibling phainhi busu jilainang.
Khnayahi namai ning ani grao-
Jadini hathan mathaone,
Dimaraji hading khoroha-
Jadini sindai sugune thangbaha,
Sotrurao ni gulithai-
Jarni sao ajaohi,
Dambra gahi thanglakha
Jathai hamya thibani
Thi hamaya thibani-
Saosibo mangthi
Laihine thangraoya-
Yung nanghi thaolakha,
Daokha nawai jitharkha-
Niniba mangthar khe,
“Smaoyakho namai-
Jiniba Dimasa,
Smaoyakho jiniba Dimajik
Khnayahi ning ani grao,
Thangkha hang rine-
Raji maiphin ne,
Thihi ning thanglakha-
Giri rikne nini yapri,
Namai thaglakhabo ning……..
Niniba lugu gibirdao,
Rikhidu niniba yaprikhe-
Labune niniba saominkhe mugthangha,
Sugunang sindai niniba-
Nolai (Dimaraji ha) walingha,
Sugunang nini hajaithani Dimaraji ha,
“Namai ning thanglakhabo,
Thihi dambrapur ha-
Wainsodu jing,
Nangdu wainmu
Slamphin ne Dimarajikhe”
Jnarine nini baothaikhe,
Khlimphain yaophladu
Nisi knreeb ne.
table {
font-family: arial, sans-serif;
border-collapse: collapse;
width: 100%;
}
td, th {
border: 1px solid #dddddd;
text-align: left;
padding: 8px;
}
tr:nth-child(even) {
background-color: #dddddd;
}
Read More Related Dimasa Poems